Tekst: Charles Wesley (“Rejoice, the Lord is King”)
Omsetjing: Jarle Fagerheim (2024)

Vi feirar Kongens Fest,
vi lovsyng Herren vår,
Og kvar ein boden gjest
ser opp mot Han som rår.
Lyft hjarta opp, slepp røysta fri,
lov Herren som oss byd til fest!

Vår Frelsar, Jesus, er
vår himmelske regent.
Vi prisar Han som her
har gjort Guds frelse kjent.
Lyft hjarta opp, slepp røysta fri,
lov Herren som oss byd til fest!

Hans rike, det står støtt,
frå jord til himmelrik.
Han som har synder bøtt
er med oss, trass vårt svik.
Lyft hjarta opp, slepp røysta fri,
lov Herren som oss byd til fest!

Han herskar der han sit
ved Farens høgre hand.
Han stør oss i vårt slit;
har Satan lagd i band.
Lyft hjarta opp, slepp røysta fri,
lov Herren som oss byd til fest!

Han knuser vondskaps hop,
han er vår frelses trygd.
Vi syng vårt gledesrop
av rein serafisk frygd.
Lyft hjarta opp, slepp røysta fri,
lov Herren som oss byd til fest!

Vi feirar i ei tru
på Jesus, han som kom,
og bygde oss ei bru
til frelse frå vår dom.
Lyft hjarta opp, slepp røysta fri,
lov Herren som oss byd til fest!